Aallartitsinerit ikileriartut

Naatsorsueqqissaartarfik siullermeerluni kalaallit inuusuttut Kalaallit Nunaanni aammalu Danmarkimi efterskolernerannut naatsorsuutinik saqqummersitsivoq, taannalu ingerlaavartumik ukiumoortumik nutarterneqartassaaq. Kalaallit Nunaanni efterskolinut nalunaarsuutit atuarfiit aallartinnerinit nassaassaapput, qallunaallu efterskoliinut nalunaarsuutit ukiumit atuarfiusumit 2011/12-imit aallartipput, ukiumi atuarfiusumi tassani efterskolernerit naammassineqartut aammalu unitsinneqartut immikkoortinneqarsinnaanerat pissutigalugu.

 

Ukiumi atuarfiusumi 2015/16-imi Kalaallit Nunaanni avataanilu efterskolernerit aallartinneqartut 425-upput, tamanna ukiuni marlunni tulleriinni kinguariarneruvoq. Efterskolernerit aallartinneqartut amerlanerpaat ukiumi atuarfiusumi 2013/14-imi 467-iupput.

 

Tabel 1. Efterskolernerit aallartinneqartut amerlassusaat, ukioq atuarfiusoq malillugu

	2009/10	2010/11	2011/12	2012/13	2013/14	2014/15	2015/16
Efterskole Villads Villadsen	68	87	82	88	93	88	86
Maniitsumi Efterskoli	-	-	75	69	67	79	74
Qallunaat nunaanni efterskolit	-	283	259	282	307	282	265
Katillugit	68	370	416	439	467	449	425

Najoqqutaq: Naatsorsueqqissaartarfik - Kisitsisaataasivimmi kisitsisit takukkit (http://bank.stat.gl/UDNESA)

 

Kalaallit efterskoliini marlunni ukiut atuarfiusut tallimat ingerlanerini efterskolernerit amerlassusaat 12-it angullugit allanngorarput. Qallunaat efterskolii ukiumi atuarfiusumi 2013/14-imi aallartitsinerit 307-iullutik amerlanerpaagallarneranut sanilliullugu 42-nik ikileriarsimapput.

 

Ataani takuneqarsinnaapput ukiuni atuarfiusumi tallimani kingullerani ukiut agguaqatigiissinneri, 16-inik ukiulinnut, 17-inik ukiulinnut aammalu ukiunut allanut agguaallugit.

 

Titartagaq 1. Efterskolernerni aallartinneqartuni ukiut agguaanneri, ukioq atuarfiusoq malillugu

Nalunaarut: Ukiumi kisitsiviusumi ukiup naanerani ukiorisat malillugit naatsorsorneqarput.

Najoqqutaq: Naatsorsueqqissaartarfik - Kisitsisaataasivimmi kisitsisit takukkit (http://bank.stat.gl/UDNESA)

 

Ukiumi atuarfiusumi 2015/16-imi efterskolernernik aallartitsisut 71 pct.-ii ukiumi 16-inik ukioqalerfimminni aallartissimapput. Tamanna ukiunut siuliinut tallimanut sanilliullugu missiliorlugu 6 procentpointinik kinguariarneruvoq. 16-inik ukiullit agguaqatigiissinnerisa annerpaartaat ukiumi atuarfiusumi 2012/13-iminngaanneerpoq, tassani aallartitsisut missiliorlugu 79 pct.-iinik annertussuseqarlutik. Piffissami pineqartumi ukiumi 17-inik ukioqalerfimmi aallartissimasut agguaqatigiissinnerini missiliorlugu 3 procentpointinik siuariartoqarsimavoq. Ukiumi atuarfiusumi 2015/16-imi 17-inik ukiullit missiliorlugu 18 pct.-inik annertussuseqarput, tamanna ukiut atuarfiusut tallimat ingerlanerini agguaqatigiissinnerisa annertunersaraat.

 

Suiaassutsit qiviaraanni ukiuni atuarfiusumi kingullerni tallimani aallartitsinerni agguaqatigiissillugu annertuumik allanngortoqarsimanngilaq. Allannguut annerpaaq 2013/14-imi pisimavoq, tassani nukappiaqqat 54 pct.-ii imaluunniit nukappiaqqat 252-it efterskolimik aallartitsisimammata.